అయ్యో…మన హీరోలంతా విలన్స్ అయిపోతున్నారే

0
5


సినిమాల్లో విలన్ ఎంత పవర్ ఫుల్ అయినా చిఎవరికి హీరో చేతిలో దెబ్బలు తినాల్సిందే, ఓడిపోవాల్సిందే. అందుకే సినిమా ఇండస్ట్రీ కి వచ్చేవాళ్ళు ఎవరయినా కూడా హీరో అయిపోవాలి అనే టార్గెట్‌తోనే వస్తారు. కానీ ఇక్కడ అవకాశాన్ని బట్టి సెటిల్ అవుతారు. కానీ ఇప్పుడు మాత్రం ఆ ట్రెండ్ రివర్స్‌లో నడుస్తుంది. హీరోలకు హీరోయిన్స్‌తో రొమాన్స్ చేసి, విలన్స్‌తో ఫైట్స్ చేసి, భారీ డైలాగులు చెప్పి అలసిపోయినట్టున్నారు. అందుకేనేమో ఇన్నాళ్లు హీరోలుగా వెలుగొందిన వాళ్ళు, కొత్తగా హీరోగా ఎంట్రీ ఇస్తున్నవాళ్ళు కూడా అవకాశం వస్తే చాలు విలన్ అవతారం ఎత్తేస్తున్నారు.

బ్యాడ్‌బాయ్‌గా కనిపించడానికి ఏ మాత్రం ఆలోచించట్లేదు. ఏ మాత్రం సందేహించట్లేదు. స్టార్ హీరోగా వెలుగొందుతున్న జూనియర్ ఎన్టీఆర్ జైలవకుశ సినిమాలో నెగెటివ్ షేడ్స్ ఉన్న పాత్రలో కనిపించాడు. దాంతో ఆ కొత్తదనంకి ఫిదా అయిన ప్రేక్షకులు ఫుల్‌గా ఎంజాయ్ చేసారు. ఆ సినిమా ఆ మాత్రం విజయం అయినా సాధించింది అంటే దానికి కారణం ఎన్టీఆర్ పోషించిన నెగెటివ్ రోల్ అనే చెప్పుకోవాలి. ఇక లీడర్ సినిమాతో హీరోగా ఎంట్రీ ఇచ్చిన రానా దగ్గుబాటి రాజమౌళి బాహుబలి కోసం విలన్‌గా మారిపోయాడు. ఆ సినిమా విజయంలో రానా పాత్ర ఎంత క్లిక్ అయ్యింది అనేది అందరికి తెలిసిందే.

మెగాప్రిన్స్‌గా ఇప్పటివరకు సాఫ్ట్ క్యారెక్టర్స్ చేసిన వరుణ్‌తేజ్ కూడా ఇప్పుడు విలన్‌గా వచ్చేస్తున్నాడు. హరీష్ శంకర్ డైరెక్ట్ చేసిన వాల్మీకి సినిమాలో గద్దలకొండ గణేష్‌గా విలనిజాన్ని పీక్స్‌లో పండిస్తున్నాడు. గెటప్‌తోనే భయపెడుతున్నాడు. ఇప్పటివరకు పక్కింటికుర్రాడిగా, అందరికి కనెక్ట్ అయిపోయిన నానీ కూడా ఇప్పుడు విలన్‌గా మారిపోయాడు. తన 25 వ సినిమా ‘V’లో నానీ కూడా నెగెటివ్ షేడ్స్ ఉన్న పాత్రలో కనిపించబోతున్నాడు. వీళ్ళు మాత్రమే కాదు అప్పటివరకు మంచి ఫీల్‌గుడ్ సినిమాలు, డిఫరెంట్ సినిమాలు చేసుకుంటూ హీరోగా బండి లాగించేస్తున్న ఆది పినిశెట్టిని కూడా విలన్‌గా మార్చేశాడు బోయపాటి. ఆ తరువాత అతన్ని మళ్ళీ తన సినిమాలో విలన్‌గానే ప్రోజెక్ట్ చేసాడు త్రివిక్రమ్. హీరోగా పెద్దగా వర్క్ అవుట్ అవ్వక ఇబ్బందిపడుతున్న నవీన్‌చంద్రని కూడా విలన్‌గా చూపించి మార్కులు వేయించుకున్నాడు మాటల మాంత్రికుడు.

రీసెంట్‌గా వచ్చిన హిట్ మూవీ ‘ఎవరు?’లో కూడా నవీన్‌చంద్రకి నెగెటివ్ షేడ్స్ ఉన్న పాత్రే దక్కింది, అదే అతనికి హిట్ అందించింది. ఇప్పుడు హీరోగా కంటిన్యూ అవుతున్న అడివి శేష్ కూడా గతంలో పంజా సినిమాలో విలన్‌గా కనిపించాడు. అడపా దడపా సినిమాలు చేసే సుధీర్ బాబు అయితే ఏకంగా బాలీవుడ్ విలన్‌గా మారాడు. స్పెషల్ ట్రైనింగ్ తీసుకుని, బాడీ బిల్డ్ చేసి భాగీ సినిమాలో విలన్ గా అదరగొట్టాడు. ఇక ఇప్పుడు నాని కోసం యంగ్ హీరో కార్తికేయ కూడా విలన్ గా మారాడు. గ్యాంగ్‌లీడర్‌లో కార్తికేయ విలన్‌గా నటించడం ఆ సినిమాకి ప్లస్ అయ్యింది.

మన హీరోలంతా ఇలా విలన్స్‌గా మారడం వల్ల వేరే భాషలనుండి ప్రతినాయకులను దిగుమతి చేసుకోవాల్సిన అవసరం తగ్గుతుంది. అలాగే రైటర్స్ కూడా కొత్త కథలు రాయడానికి వీలుదక్కుతుంది. మన హీరోల్లో వచ్చిన ఈ మార్పు ఖచ్చితంగా ఆహ్వానించదగ్గదే.



Source link

LEAVE A REPLY

Please enter your comment!
Please enter your name here