ఉగ్రవాదంపై పాక్ చర్యలు.. అమెరికా నివేదికలో షాకింగ్ నిజాలు!

0
1


ఉగ్రవాదం విషయంలో పాకిస్థాన్ తీసుకుంటున్న చర్యలపై అగ్రరాజ్యం అమెరికా మరోసారి పెదవి విరిచింది. తన భూభాగంలోని లష్కరే తొయిబా, జైషే మహ్మద్ లాంటి ఉగ్రవాద సంస్థలు నిధులు సేకరించడకుండా అడ్డుకోవడంలో పాక్ దారుణంగా విఫలమైందని అమెరికా పేర్కొంది. అంతేకాదు, దేశం వెలుపల దాడులపై దృష్టి సారించిన అనేక ఉగ్రవాద సంస్థలు పాక్ భూభాగం నుంచే కార్యకలాపాలు సాగిస్తున్నాయని ఉద్ఘాటించింది. ఉగ్రవాదంపై అమెరికా రక్షణ శాఖ వార్షిక నివేదిక 2018ను శుక్రవారం వెల్లడించింది. ఉగ్రవాదాన్ని పాకిస్థాన్ ఏ మాత్రం నిరోధించలేకపోయిందని ఈ నివేదికలో వివరించింది.

ఆఫ్గన్‌ ప్రభుత్వం, తాలిబన్లకు మధ్య రాజకీయ సయోధ్యకు మద్దతు ప్రకటించిన పాకిస్థాన్.. తన భూభాగంలోని ఉగ్రవాదులు, హక్కానీ నెట్‌వర్క్‌ను నియంత్రించడం లేదని విమర్శించింది. ఈ ఉగ్రవాద సంస్థలు అమెరికా, ఆఫ్గన్ దళాలకు కంటగింపుగా మారాయని తెలిపింది. ఉగ్రవాద సంస్థలకు నిధులు అందకుండా, నియామకాలు జరగక్కుండా పాక్ ప్రభుత్వం నిరోధించలేకపోయిందని మండిపడింది. గతేడాది జులైలో జరిగిన సాధారణ ఎన్నికల్లో లష్కరే తొయిబా సానుభూతిపరులను పోటీకి బహిరంగంగానే అనుమతించిందని నివేదిక స్పష్టం చేసింది.

సాయుధలైన ఉగ్రవాదులను అనుమతించవద్దని తన జాతీయ కార్యాచరణ ప్రణాళికలో పాక్ పేర్కొన్నప్పటికీ.. దేశం వెలుపల దాడులపై దృష్టి సారించిన హక్కానీ నెట్‌వర్క్, లష్కరే తొయిబా, జైషే మహమ్మద్ లాంటి అనేక ఉగ్రవాద సంస్థలు పాకిస్థాన్ భూభాగం నుంచి పనిచేస్తూనే ఉన్నాయని తెలిపింది. దేశవ్యాప్తంగా ఉగ్రవాద స్థావరాలకు సంబంధించి ప్రభుత్వం, ఆర్మీ చూసీచూడనట్టు వ్యవహరించాయని నివేదిక పేర్కొంది. ఉగ్రవాద సంస్థలు, ఉగ్రవాదులు దేశంలో బహిరంగంగా తిరుగుతున్నా సరైన చర్యలు తీసుకోవడంలేదని ధ్వజమెత్తింది.

తెహ్రీక్ ఇ తాలిబన్ పాకిస్థాన్, జమాత్ ఉల్హార్, ఇస్లామిక్ స్టేట్స్ ఖోరోసన్ ప్రావిన్స్ లాంటి ఉగ్రవాద సంస్థలు దేశంలోనే దాడులపై దృష్టిసారించాయని వివరించింది. ఈ సంస్థలు అనేక సార్లు భారీ దాడులకు పాల్పడ్డాయని తెలిపింది. మనీ లాండరింగ్ ఆసియా-పసిఫిక్ గ్రూప్‌లో సభ్యదేశమైన పాకిస్థాన్.. అంతర్జాతీయ ప్రమాణాలను పాటించి ఉగ్రవాదులకు నిధులు అందకుండా నిరోధించాలని సూచించింది. ఉగ్రవాద నిరోధక చట్టం ప్రకారం.. ఉగ్రవాదులకు నిధులు అందజేయడం నేరమైనా దానిని పాక్ అనుసరించడంలో దారుణంగా విఫలమైందని దుయ్యబట్టింది.



Source link

LEAVE A REPLY

Please enter your comment!
Please enter your name here