కశ్మీర్‌ను భారత్ దండెత్తి ఆక్రమించింది.. ఐరాసలో మలేసియా తీవ్ర వ్యాఖ్యలు

0
2


కశ్మీర్ అంశంలో భారత్‌కు వ్యతిరేకంగా ఆరోపణలు చేస్తోన్న పాకిస్థాన్‌‌కు మరో మిత్రదేశం లభించింది. ఇప్పటి వరకూ చైనా, టర్కీ మాత్రమే పాక్‌కు మద్దతుగా నిలవగా.. మలేసియా కూడా వాటితో స్వరం కలిపింది. ఐక్యరాజ్య సమితి సర్వప్రతినిధి సభలో ప్రసంగించిన మలేసియా ప్రధాని మహతిర్ మహ్మద్ భారత్‌పై తీవ్ర ఆరోపణలు గుప్పించారు. స్వతంత్ర దేశమైన కశ్మీర్‌ను భారత్ దండెత్తి ఆక్రమించిందన్నారు. ఐక్యరాజ్యసమితి తీర్మానానికి వ్యతిరేకంగా భారత్ వ్యవహరించిందన్నారు.

భారత్ అలా చేయడానికి కారణాలు ఉండొచ్చు. కానీ భారత్ చేసింది మాత్రం తప్పేనని మహ్మద్ వ్యాఖ్యానించారు. శాంతియుతంగా సమస్యను పరిష్కరించుకోవాలని మలేసియా ప్రధాని సూచించారు. భారత్ తప్పనిసరిగా పాకిస్థాన్‌తో కలిసి ఈ సమస్యను పరిష్కరించుకోవాలన్నారు.

సెప్టెంబర్ నెలారంభంలో రష్యా వేదికగా జరిగిన ఈస్ట్రన్ ఎకనమిక్ ఫోరం సందర్భంగా భారత ప్రధాని నరేంద్ర మోదీ, మహతిర్ సమావేశమయ్యారు. భారత్ జాకీర్ నాయక్ అప్పగింత అంశాన్ని ప్రస్తావించగా.. మలేసియా కశ్మీర్ అంశాన్ని ప్రస్తావించింది. సెప్టెంబర్ 5న జరిగిన భారత్, మలేసియా ద్వైపాక్షిక సమావేశంలో కశ్మీర్ అంశంపై ప్రధానంగా చర్చించినట్టు మలేసియా మీడియా పేర్కొంది.

కశ్మీర్ అంశం, ఆర్టికల్ 370 రద్దు లాంటి అంశాలను ప్రధాని మోదీ మహతిర్‌కు వివరించారని.. మలేసియా విదేశాంగ మంత్రి దతుక్ సైఫుద్దీన్ అబ్దుల్లా తెలిపారు. చర్చల ద్వారా సమస్యను పరిష్కరించుకోవాలని తాము సూచించినట్టు వెల్లడించారు. కశ్మీర్ సమస్య పరిష్కారం కోసం మూడో దేశం జోక్యం చేసుకునే అవకాశం ఇవ్వాలని లేదంటే అంతర్జాతీయ న్యాయస్థానం దృష్టికి తీసుకెళ్లాలన్నారు.

జకీర్‌ అప్పగింత విషయంలో భారత్‌ తమను ఒత్తిడి చేయలేదని గతంలో మలేసియా ప్రధాని వ్యాఖ్యానించారు. మహతిర్ వ్యాఖ్యలను విదేశాంగ మంత్రి జైశంకర్‌ ఖండించారు.

ఐరాస సర్వప్రతినిధి సభ సందర్భంగా పాకిస్థాన్, టర్కీ, మలేసియా త్రైపాక్షిక సమావేశాన్ని నిర్వహించాయి. ఇస్లామోఫోబియాను ఎదుర్కోవడం కోసం, ఇస్లాం పట్ల ఉన్న అనుమానాలను తొలగించడం కోసం ఓ ఇంగ్లిష్ టీవీ ఛానల్‌ను ఏర్పాటు చేయాలని నిర్ణయించారు.



Source link

LEAVE A REPLY

Please enter your comment!
Please enter your name here