కుల్‌భూషణ్ ఉరిశిక్ష నిలుపుదల.. అంతర్జాతీయ కోర్టులో భారత్‌ విజయం

0
0


పాకిస్థాన్ చెరలో బందీగా ఉన్న కుల్‌భూషణ్ జాదవ్ కేసులో భారత్ విజయం సాధించింది. ఇండియన్ ఎయిర్ ఫోర్స్ మాజీ అధికారి జాదవ్‌పై పాక్ మిలిటరీ కోర్టు విధించిన మరణశిక్షను అంతర్జాతీయ న్యాయస్థానం నిలిపివేసింది. కేసును పున:సమీక్షించాలని పాక్‌కు సూచించింది. కుల్‌భూషణ్ తరఫున న్యాయవాదిని నియమించుకునే హక్కు భారత్‌కు ఉందని స్పష్టం చేసింది. నెదర్లాండ్స్‌లోని ది హేగ్‌లో ఉన్న అంతర్జాతీయ న్యాయస్థానం బుధవారం (జులై 17) సాయంత్రం ఈ మేరకు తీర్పు వెల్లడించింది. దీంతో భారత్‌లో సంబరాలు అంబరాన్నంటాయి.

16 మంది న్యాయమూర్తుల్లో 15 మంది భారత్‌కు అనుకూలంగా తీర్పు చెప్పారు. దీంతో అంతర్జాతీయ వేదికపై పాకిస్థాన్‌కు మరోసారి చుక్కెదురైంది. కుల్‌భూషణ్ జాదవ్‌ కేసును పాకిస్థాన్ పున:సమీక్షించి, సరైన సాక్ష్యాధారాలు సమర్పించే వరకు ఆయనపై విధించిన ఉరిశిక్షను నిలుపుదల చేస్తున్నట్లు అంతర్జాతీయ న్యాయస్థానం స్పష్టం చేసింది.

భారత నౌకాదళ మాజీ అధికారి కుల్‌భూషణ్ జాదవ్ 2016లో పాకిస్థాన్‌ భద్రతా దళాలకు చిక్కారు. గూఢచౌర్యానికి, ఉగ్రవాదానికి పాల్పడ్డారనే ఆరోపణలతో ఆయణ్ని అరెస్టు చేశారు. పాక్ మిలిటరీ న్యాయస్థానం 2017 ఏప్రిల్‌లో కుల్‌భూషణ్‌కు మరణశిక్ష విధించింది. దీనిపై భారత్‌ తీవ్ర అభ్యంతరం వ్యక్తం చేసింది. అదే ఏడాది మే 8న ఐసీజేను ఆశ్రయించింది.

కుల్‌భూషణ్.. ఇరాన్‌లో వ్యాపారం చేసుకుంటుండగా అక్రమంగా నిర్బంధించారని భారత్ వాదించింది. న్యాయమూర్తి అబ్దుల్‌ఖవి అహ్మద్‌ యూసుఫ్‌ నేతృత్వంలోని 10 మంది సభ్యుల ధర్మాసనం.. తాము తుది తీర్పు ఇచ్చేవరకూ మరణశిక్ష అమలును నిలిపివేయాలని పాకిస్థాన్‌ను గతంలో ఆదేశించింది. ఈ అంశంపై ఫిబ్రవరిలో విచారణ చేపట్టిన ఐసీజే.. ఇరు దేశాల వాదనలను వింది. తాజాగా మరోసారి విచారణ చేపట్టి కుల్‌భూషణ్‌ మరణశిక్షను నిలిపివేస్తూ తీర్పు వెలువరించింది.

జాదవ్‌ను కలవడానికి తల్లి, భార్యకు అవకాశం ఇచ్చినా..
జాదవ్‌ను కలిసేందుకు 2017 డిసెంబర్ 25న అతడి తల్లి, భార్యకు పాకిస్థాన్ అనుమతి ఇచ్చింది. భారత్ ఒత్తిడి తీసుకురావడం, అంతర్జాతీయ న్యాయస్థానం ఆదేశాలతో పాక్ ఈ అవకాశం కల్పించింది. కానీ, జాదవ్ భార్య, సతీమణితో పాక్ సైన్యం, మీడియా జుగుప్సాకరంగా ప్రవర్తించింది. ఈ అంశం మరోసారి వివాదాస్పదమైంది. మంగళసూత్రం తీయించి, దుస్తులను మార్పించి అవమానించారని భారత్ ఆక్షేపించింది. జాదవ్‌ను భయభ్రాంతులకు గురిచేసి వాస్తవాలు చెప్పకుండా పాక్ సైన్యం అడ్డుకుందని అంతర్జాతీయ సమాజం ముందు భారత్ గోడు వెల్లబోసుకుంది. పాక్ తీరుతో తీవ్ర నైరాశ్యంలో కూరుకుపోయిన జాదవ్ కుటుంబానికి.. ఐసీజే తాజాగా ఇచ్చిన తీర్పు ఆశలు రేపుతోంది.



Source link

LEAVE A REPLY

Please enter your comment!
Please enter your name here