కుల్‌భూషణ్ కేసులో వియన్నా ఒప్పందాన్ని పాక్ ఉల్లంఘించింది.. ఐరాసకు ఐసీజే నివేదిక

0
2


భారత నౌకాదళ మాజీ అధికారి కుల్‌భూషణ్ జాదవ్ కేసులో పాకిస్థాన్.. వియన్నా ఒప్పందాన్ని ఉల్లంఘించినట్టు ఐక్యరాజ్యసమితి సాధారణ సభకు అంతర్జాతీయ న్యాయస్థానం ప్రధాన న్యాయమూర్తి అబ్దుల్కావి యూసఫ్ తెలియజేశారు. ఈ మేరకు ఐరాస సాధారణ సభకు బుధవారం ఆయన నివేదిక సమర్పించారు. వియన్నా ఒప్పందంలోని ఆర్టికల్ 36 ప్రకారం జాదవ్ కేసులో పాకిస్థాన్ నిబంధనలను ఉల్లంఘించిందని పేర్కొన్నారు. వియన్నా ఒప్పందం ఆర్టికల్ 36లో పేర్కొన్న హక్కులను కాలరాసినట్టు కోర్టు పరిశీలనలో తేలిందన్నారు.

ఆర్టికల్ 36లోని ‘ఆలస్యం చేయకుండా’ అనే అంశాన్ని పాకిస్థాన్ మరోలా అర్థం చేసుకుందని ఆయన ఆక్షేపించారు. జాదవ్‌ కేసులో ప్రత్యేక పరిస్థితులను పరిగణనలోకి తీసుకుని వియన్నా ఒప్పందం ప్రకారం.. అతడిని అరెస్ట్ చేసిన మూడు వారాల తర్వాత ఆలస్యం చేయకుండా పాకిస్థాన్ ఓ నోటిఫికేషన్ జారీచేసి భారత కాన్సులేట్‌కు సమాచారం ఇవ్వాలి. కానీ, పాక్ అలా చేయకుండా ఏకపక్షంగా వ్యవహరించిందని వివరించారు. 2008లో భారత్, పాక్ మధ్య జరిగిన ద్వైపాక్షిక ఒప్పందం ప్రకారం వియన్నా కన్వెన్షన్ వర్తించదనే ఆసక్తికరమైన అంశం తెరపైకి వచ్చిందని, అయితే దీనికి సంబంధం లేదని తెలిపారు.

తమ దేశంలో గూఢచర్యం, ఉగ్రవాదానికి పాల్పడుతున్నాడని ఆరోపిస్తూ పాకిస్థాన్ మిలటరీ కోర్టు జాదవ్‌కు ఉరిశిక్ష విధించిన విషయం తెలిసిందే. పాకిస్థాన్ చర్యలను తీవ్రంగా వ్యతిరేకించిన భారత్.. అంతర్జాతీయ న్యాయస్థానంలో సవాల్ చేసింది. ఈ అంశంలో వియన్నా ఒప్పందాన్ని పాకిస్థాన్ ఉల్లంఘించిందని వాదించింది. భారత్ వాదనలతో ఏకీభవించిన ఐసీజే… కులభూషణ్‌ కేసు విచారణ సక్రమంగా జరగలేదని అభిప్రాయపడింది. పాక్ జైల్లో ఉన్న కులభూషణ్‌ను కలిసేందుకు భారత్‌కు అనుమతి ఇవ్వలేదని, దౌత్యపరమైన సాయానికి కూడా వీలు కల్పించకుండా వియన్నా ఒప్పంద నిబంధనలను ఉల్లంఘించిందని ఈ ఏడాది జులై 17న కోర్టు తప్పుబట్టింది.

జాదవ్‌ను అరెస్ట్‌ చేయగానే భారత్‌కు కనీసం సమాచారం ఇవ్వలేదని ఐసీజే పేర్కొంది. ఈ మేరకు పాక్‌ సైనిక కోర్టు విధించిన ఉరిశిక్ష అమలుపై ఐసీజే స్టే ఇచ్చింది. పాక్‌ వ్యవహరించిన తీరును తీవ్ర స్థాయిలో ఆక్షేపిస్తూ 15-1 తేడాతో తీర్పును వెలువరించింది. ధర్మాసనంలో ఒక్క పాక్‌ జడ్జి మాత్రమే ఈ తీర్పుతో విభేదించారు. పాక్‌కు వంతపాడే చైనా జడ్జి కూడా కులభూషణ్‌కు అనుకూలంగా ఈ తీర్పునకు ఆమోదముద్ర వేయడం విశేషం.



Source link

LEAVE A REPLY

Please enter your comment!
Please enter your name here