చంద్రుడిపై స్థలం కొన్నా.. ఇవిగో ఆధారాలు, అక్కడ ఇల్లు కడతా: రాజీవ్

0
1


చంద్రయాన్-2తో యావత్ ప్రపంచాన్ని అబ్బురపరిచిన ఇండియా.. త్వరలో వ్యోమగాములను సైతం అక్కడికి పంపేందుకు ప్లాన్ చేస్తోంది. అయితే, హైదరాబాద్‌కు చెందిన రాజీవ్ వి. బగ్దీ ఇస్రో కంటే ముందుగానే చంద్ర మండలంపై అడుగు పెట్టాలని ప్లాన్ చేసుకున్నారు. 2003లోనే ఆయన చంద్రమండలంపై స్థలాన్ని కొనుగోలు చేశారు.

చంద్రుడి మీద స్థలం కొనుగోలు చేయడం ఏమిటీ? ఎవరో ఆయన్ని మోసం చేసి ఉంటారనే కదా మీ సందేహం? అయితే, రాజీవ్ మాత్రం ఇందులో ఎలాంటి మోసం లేదని, అన్నీ పరిశీలించిన తర్వాతే అక్కడ స్థలాన్ని కొనుగోలు చేశానని అంటున్నారు. ఆయన ‘సమయం తెలుగు’తో మాట్లాడుతూ.. పలు ఆసక్తికర విషయాలు చెప్పారు.

2003లో కొనుగోలు: అప్పట్లో చంద్రుడి మీద స్థలం అమ్ముతామనే ప్రకటన చూశాను. అది నన్ను బాగా ఆకట్టుకుంది. అన్నివిధాలా పరిశీలించిన తర్వాతే దాన్ని కొనుగోలు చేశాను. 5 ఎకరాల స్థలం కోసం 140 డాలర్లు (భారత కరెన్సీలో రూ.9629) చెల్లించాను. నేను న్యూమరాలజిస్ట్ కావడం వల్ల ఎప్పుడూ గ్రహాలు గురించి తెలుసుకుంటుంటాను. ప్రస్తుతం నేను తీసుకున్నది ల్యాండ్ క్లేమ్ మాత్రమే. ప్రస్తుతం వీటి ధరలు బాగా పెరిగాయి.

చూడకుండా ఎలా?: భూమి మీద సొంత స్థలాన్ని కాపాడుకోవడమే కష్టం. ఒరిజనల్స్ ఉన్నా.. భూమిని దక్కించుకోలేని పరిస్థితి. అలాంటిది చంద్రమండలంపై స్థలాన్ని చూడకుండా ఎలా కొనుగోలు చేశారు? భవిష్యత్తులో అది మీదని ఎలా గుర్తుపడతారనే ప్రశ్నకు ఆయన స్పందిస్తూ.. ‘‘ఇందుకు నా దగ్గర అన్ని ఆధారాలు ఉన్నాయి. ఆ ప్రాజెక్ట్ నాకు బాగా నచ్చింది. తప్పకుండా అక్కడ నాకు స్థలం ఉందని నమ్ముతున్నా. జనాలు నన్ను చూసి నవ్వినా అభ్యంతరం లేదు. చంద్రుడి మీదకు వెళ్లాలనేది నా కల’’ అని తెలిపారు.

చంద్రయాన్ -3లో అవకాశమిస్తే..: ఇస్రో చంద్రయాన్ – 3 ద్వారా వ్యోమగాములను పంపితే.. నేను కూడా వెళ్తా. ఇందుకు అధికారికంగా ఎలాంటి ప్రయత్నాలు చేయలేదు. భవిష్యత్తులో నాకు ఆ అవకాశం కల్పిస్తారని ఆశిస్తున్నా’’ అన్నారు. చంద్రుడి మీదకు వెళ్లే అవకాశం వస్తే ఏం చేస్తారు? అనే ప్రశ్నకు బదులిస్తూ.. ‘‘నేను కుటుంబంతో పిక్నిక్ వెళ్తా. సంతోషంగా గడుపుతా. అక్కడ ఇల్లు కట్టుకుంటాను’’ అని తెలిపారు.

‘ది లూనార్ రిపబ్లిక్’ ద్వారా తాను ఈ స్థలాన్ని కొనుగోలు చేశానని రాజీవ్ చెప్పారు. ఇంతవరకు ఒకే.. కానీ, చంద్రుడి మీద ఇప్పటివరకు ఎవరికీ ఎలాంటి హక్కులు లేవు. అలాంటప్పుడు ఆ సంస్థ చంద్రుడి మీద స్థలాన్ని ఎలా విక్రయిస్తుందనేదే సందేహం. మరి, రాజీవ్ బగ్దీ చెప్పింది నిజమైతే.. తప్పకుండా ఆయన కల నెరవేరాలని కోరుకుందాం.
Video/Reporting: Raj Kiran



Source link

LEAVE A REPLY

Please enter your comment!
Please enter your name here