చిత్రంలో ‘మహాత్మ’.. ప్రతిబింబించిన గాంధీ పాత్రలివిగో

0
4


మహాత్మా గాంధీ…ఒక మామూలు మనిషి మహాత్ముడిగా మారిన వైనం, అహింసే ఆయుధంగా, మౌనమే తన సమాధానంగా పోరాటం సాగించిన మార్గం, వందల ఏళ్ళ పరాయిపాలనను కూకటివేళ్ళతో సహా పెకిలించిన విధానం అన్నీ కూడా అద్భుతాలే. మిగతావాళ్లందరికి అసాధ్యాలే… కానీ గాంధీజీకి మాత్రమే అది ఎలా సాధ్యమయింది?, ఆయన ఊహ ఎలా నిజమైంది?, ఆయన మార్గం అనేకమందికి ఎలా దిశానిర్దేశం చెయ్యగలిగింది. అదంతా కూడా మాటల్లో వర్ణించడం అంత సులభం కాదు.

అందుకే ఒక అద్భుతం అనదగ్గ ఆ మాహాఘట్టాన్ని బలమయిన మీడియా అయిన సినిమా ద్వారా అనేకసార్లు ప్రేక్షకులముందుకు తీసుకువచ్చారు. ప్రేక్షకులు కూడా అప్పటికే తెలిసినా కూడా ఆ మహాత్ముడి జీవితాన్ని మరొకసారి వెండితెరపై చూసి మురిసిపోయారు. గాంధీజీ 150వ జయంతి సందర్భంగా ఆయన కథతో, ఆయన జీవితం స్పూర్తితో తెరకెక్కిన సినిమాల విశేషాలు ఇప్పుడు చూద్దాం.

గాంధీజీ పై చాలా సినిమాలు వచ్చాయి. కానీ 1982లో తెరకెక్కిన గాంధీ సినిమా మాత్రం ప్రత్యేకం. అయితే దానికి ప్రత్యేకమయిన కారణం కూడా ఉంది. ఈ సినిమాని రూపొందించింది ఇంగ్లాండ్‌లో పుట్టిపెరిగిన రిచర్డ్ అటెన్‌బరో అనే ఫిల్మ్ మేకర్. ఆ సినిమాకి ఆయనే ప్రొడ్యూసర్ కూడా. ఇక ఆ సినిమాలో గాంధీగా నటించింది కూడా బ్రిటిష్ యాక్టర్ అయిన బెన్ కింగ్స్‌లే.

ఇలా ఏ దేశం పై అయితే గాంధీజీ తన పోరాటాన్ని సాగించారో వాళ్ళే మళ్ళీ ఆయనపై సినిమా తియ్యడం, దాన్ని ఇంగ్లాండ్‌లో కూడా రిలీజ్ చేస్తే అక్కడ అది ఘనవిజయం సాధించడం అనేది సామాన్యమయిన విషయం కాదు. పైగా ఆ సినిమాలో గాంధీజీ పాత్రను అద్బుతంగా పోషించిన బెన్ కింగ్స్‌లే కి అకాడెమీ (ఆస్కార్) అవార్డు కూడా వచ్చింది. అంటే గాంధీజీ జీవితంలో ఉన్న సారాంశం ఎంత గొప్పది అనేది ఆ సినిమాలో చూపించడం వల్ల, అది అందరి మనసులకు హత్తుకోవడం వల్ల ఆ విజయం సాధ్యమయింది. ఇక ఆ సినిమాతో మరొక సారి గాంధీజీ స్ఫూర్తి అనేకదేశాల్లోని ఎంతోమందిని ఇన్స్పయిర్ చేసింది.

గాంధీ అనేది గొప్ప సినిమా అయినా కూడా అందులో గాంధీజీని సౌత్ ఆఫ్రికాలో ట్రైయిన్‌లో నుండి తోసివేసిన దగ్గరినుండి మొదలుపెట్టి ఆయన మరణం వరకు మొత్తం చూపించారు. కానీ అసలు గాంధీజీ స్వభావం అలా రూపుదిద్దుకోవడానికి మూలం ఏంటి?, ఆయన ప్రస్థానం ఎలా మొదలయ్యింది లాంటి విశేషాలతో ప్రముఖ దర్శకుడు శ్యామ్ బెనెగల్ ‘ది మేకింగ్ ఆఫ్ ది మహాత్మ’ అనే సినిమా రూపొందించాడు.

ఆ సినిమాలో గాంధీజీ మహాత్ముడిగా మారడానికి ముందు జీవితాన్ని ఆవిష్కరించారు. ఆ సినిమా కూడా ఇంగ్లీష్‌లో రూపొంది చాలా ఆదరణ పొందింది. 1996లో తెరకెక్కిన ఆ సినిమాని జాతీయ అవార్డు వరించింది. ఆ సినిమాలో గాంధీజీగా నటించిన రంజిత్ కపూర్‌కి ఉత్తమ నటుడిగా జాతీయ పురస్కారం దక్కింది.

గాంధీజీకి సంబందించిన విషయాలు, విశేషాలతో ఎప్పుడు సినిమా తీసినా కూడా ఎక్కువ సార్లు అది విజయాన్ని అందుకుంది. ఎందుకంటే అప్పటివరకు ప్రపంచంలో ఎంతో శక్తివంతమయిన ఆయుధాలు ఉన్నా కూడా అహింస అనే దారికి ఉన్న పవర్ అనేది మాత్రం తొలిసారిగా తెలిసింది మాత్రం అప్పుడే. ఇక దేశం కంటే ఏదీ ఎక్కువ కాదు అన్న ఆయన ఆలోచన, దేశం కోసం ఏదైనా వదులుకోవచ్చు అన్న ఆయన త్యాగనిరతి అనేది ఎవరినయినా అబ్బురపరుస్తుంది.

అందుకే లగేరహో మున్నాభాయ్ సినిమా అంత పెద్ద విజయం దక్కించుకుంది. ఆ సినిమాలో ఒక మాములు దాదా కూడా గాంధీగిరికి తలొగ్గి మంచివాడిగా మారతాడు. అలాగే కొంతమంది అంటుంటారు ”అప్పుడు కాబట్టి గాంధీజీ అహింస అంటూ స్వాతంత్య్రం సంపాదించారు. ఇప్పుడు అయితే అది సాధ్యం అయ్యేది కాదు, ఆయన దారిలో వెళితే పని కాదు” అని. కానీ ఆ సినిమాలో మాత్రం గాంధీజీ నడిచిన దారి, ఆయన ఆలోచనలు ఇప్పుడు కూడా ఎలాంటి ప్రభావం చూపుతాయి అనే విషయాలని చాలా విశదంగా, వినోదాత్మకంగా వివరించారు. అదే సినిమాని తెలుగులో శంకర్‌దాదా జిందాబాద్‌గా పునర్నిర్మించారు.

శ్రీకాంత్ తన 100 వ సినిమాగా మహాత్మని తెరకెక్కించారు. ఆ సినిమాలో కూడా ఒక బస్తి రౌడీ జీవితాన్ని మహాత్ముడి గుణాలు, ఆలోచనలు ఎలా మార్చాయి,ఆ తరువాత అతని జీవితం ఎలాంటి మలుపు తిరిగింది అనేది చూపించారు. ఇలా మహాత్మ గాంధీజీ అనే వ్యక్తి కారణజన్ముడు అని ఒప్పుకుని తీరేలా ఆయన గురించి వచ్చిన ప్రతి సినిమా కూడా రుజువు చేసి చూపిస్తుంది. ఇప్పుడే కాదు ఎప్పటికి కూడా ఆయన చూపిన మార్గం అందరూ ఆచరించదగ్గది. అందరికి ఆమోదయోగ్యమైంది. ఆయన చూపిన దారిలో నడవడమే జాతిపితకు మనం సమర్పించే అసలయిన నివాళి.



Source link

LEAVE A REPLY

Please enter your comment!
Please enter your name here