నాని హీరోయిన్‌తో ఆది రొమాన్స్.. ‘జోడి’ వచ్చేస్తుంది!

0
1


యూత్‌ఫుల్ స్టార్ ఆది సాయికుమార్ ఒక మంచి హిట్ కోసం ఎదురుచూస్తున్నారు. ఆది నటుడిగా మంచి గుర్తింపు తెచ్చుకున్నా సోలో హీరోగా ఇంకా సరైన సక్సెస్‌ను అందుకోదు. ఇటీవల వచ్చిన ‘బుర్రకథ’ సినిమాపై ఆది ఆశలు పెట్టుకున్నా ఆ చిత్రం ప్రేక్షకులను ఆకట్టుకోవడంలో విఫలమైంది. కాన్సెప్ట్ బాగున్నా దర్శకుడు రత్నబాబు తడబాటుతో సినిమాను సరిగా తెరకెక్కించలేకపోయారు. అయితే, ఇప్పుడు ఆది ఒక మంచి లవ్‌స్టోరీతో ప్రేక్షకుల ముందుకు వస్తున్నారు. ఈ చిత్ర టైటిల్ ‘జోడి’.

కన్నడ బ్యూటీ, ‘జెర్సీ’ ఫేమ్ శ్రధ్ధా శ్రీనాథ్ ఈ చిత్రంలో ఆదికి జోడీగా నటించారు. ఈ చిత్ర షూటింగ్ తాజాగా పూర్తయింది. సెప్టెంబర్ 6న సినిమాను విడుదల చేయబోతున్నారు. ఇటీవల విడుదలైన ‘జోడి’ టీజర్‌కు మంచి స్పందన వచ్చింది. యూత్‌ఫుల్ ఎంటర్‌టైనర్‌గా తెరకెక్కిన ఈ చిత్రానికి విశ్వనాథ్ అరిగెల దర్శకత్వం వహించారు. గతంలో ‘‘వాన, మస్కా, సినిమా చూపిస్త మామ’’ చిత్రాలకు విశ్వనాథ్ అసోసియేట్ డైరెక్టర్‌గా పనిచేశారు. ఇప్పుడు ‘జోడి’ ద్వారా దర్శకుడిగా పరిచయమవుతున్నారు.

దర్శకుడు విశ్వనాథ్ అద్భుతమైన ప్లానింగ్ వల్ల ‘జోడి’ చాలా వేగంగా షూటింగ్ పూర్తి చేసుకుందని చిత్ర యూనిట్ చెబుతోంది. క్వాలిటీ పరంగా ఎక్కడా రాజీ పడకుండా నిర్మాతలు పద్మజ, సాయి వెంకటేష్ గుర్రం ఈ చిత్రాన్ని నిర్మించారట. చిత్రం అనుకున్న దానికంటే బాగా వచ్చిందని అంటున్నారు. ప్రస్తుతం పోస్ట్ ప్రొడక్షన్ పనులు చివరి దశలో ఉన్న ‘జోడి’ చిత్ర ప్రమోషన్స్ కూడా త్వరలోనే ప్రారంభం కానున్నాయి.

కాగా, ఈ చిత్రంలో సీనియర్ నటుడు వీకే నరేష్, సత్య, వెన్నెల కిశోర్, సిజ్జు, స్వప్నిక, సితార, మాధవి, గొల్లపూడి మారుతీరావు, వర్షిణి సౌందరరాజన్, ప్రదీప్ ఇతర పాత్రల్లో నటిస్తున్నారు. భావనా క్రియేషన్స్ బ్యానర్‌పై శ్రీనివాస్ గుర్రం సమర్పణలో పద్మజ, సాయి వెంకటేష్ గుర్రం నిర్మిస్తున్నారు. ‘నీవే’ ఫణి కళ్యాణ్ ఈ చిత్రానికి సంగీతం సమకూర్చారు. ఎస్.వి.విశ్వేశ్వర్ సినిమాటోగ్రఫీ అందించారు. త్యాగరాజు(త్యాగు) రాజు మాటలు రాశారు.



Source link

LEAVE A REPLY

Please enter your comment!
Please enter your name here