పూరి పెద్ద మనసు.. ఖాళీగా ఉన్న డైరెక్టర్లు, కో-డైరెక్టర్లకు సాయం

0
3


సినిమాలపై మక్కువ, సినిమా ఇండస్ట్రీలో పనిచేయాలనే పిచ్చితో చాలా మంది హైదరాబాద్‌కు వస్తుంటారు. కృష్ణానగర్‌లో ఉంటూ అవకాశాల కోసం తిరుగుతుంటూరు. కానీ, సినిమా ఇండస్ట్రీలో పని దొరకాలంటే టాలెంట్‌తో పాటు లక్ కూడా కలిసిరావాలి. అదృష్టవశాత్తు అవకాశం వచ్చినా దాన్ని నిలబెట్టుకునే శక్తి ఉండాలి. అవకాశం వచ్చినా అందరూ సక్సెస్ కాలేరు. ఒకటి రెండు సినిమాల్లో చేసిన తరవాత అవకాశాల్లేక రోడ్లెక్కిన వాళ్లు ఎంతో మంది మన ఇండస్ట్రీలో ఉన్నారు.

ఇలాంటి వాళ్లలో నటీనటులు, దర్శకులు, కథకులు అందరూ ఉంటారు. అయితే, ప్రస్తుతం అవకాశాలు లేక, ఇబ్బందుల్లో ఉన్న ఓ 20 మంది డైరెక్టర్లు, కో-డైరెక్టర్లకు ఆర్థిక సాయం అందించేందకు ప్రముఖ దర్శకుడు పూరి జగన్నాథ్, ఒకప్పటి నటి, ప్రస్తుతం నిర్మాత అయిన ఛార్మి ముందుకొచ్చారు. ఈ మేరకు తమ నిర్మాణ సంస్థ పూరి కనెక్ట్స్ ఎల్ఎల్‌పి పేరిట మీడియాకు ఒక ప్రకటనను విడుదల చేశారు. రేపు (సెప్టెంబర్ 28న) పూరి జగన్నాథ్ పుట్టినరోజును పురష్కరించుకుని వారందరికీ సాయం అందించనున్నట్టు ఈ ప్రకటనలో పేర్కొన్నారు.

Also Read: కిర్రాక్ లుక్‌లో విజయ్ దేవరకొండ.. వైరల్

‘‘సినిమాతో మమేకమైవుండే ప్రతి ఒక్కరిపైన మాకు అపారమైన గౌరవం వుంది. సినిమా అన్నది వ్యాపారమే అయినా, డబ్బులు పెట్టే నిర్మాత కూడా దర్శకుడి ప్రతిభనే నమ్ముతాడు. దర్శకుడి మేథస్సు, సృజనాత్మకత, అవిశ్రాంతమైన శ్రమకు ప్రతిరూపం సినిమా. ఒక దర్శకుడికి సినిమా అవకాశం వస్తే ఎంతో మందికి పని దొరుకుతుంది. అందుకే దర్శకులు, దర్శకత్వశాఖ బాగుండాలని కోరుకుంటున్నాం.

విజయాలు, అపజయాలు సహజం. అయినా సినిమానే నమ్ముకుని మనదైన రోజుకోసం ఎదురుచూస్తూ వుంటాం. దర్శకత్వశాఖలోని మనవాళ్ళు కొందరు పనిలేకనో సినిమాలు చేసే అవకాశం రాకనో ఖాళీగా వుండి ఇబ్బందులు పడటం చూసి, మా మనసుకు కష్టం అనిపించింది. అందరు బావుండాలని కళ్ళు మూసుకుని దేవుడ్ని ప్రార్ధించడం కన్నా, కొందరికి కొంతలో కొంతయినా ఆర్థికంగా సహాయం చేయాలనిపించింది.

చిత్రపరిశ్రమ అందించిన “ఇస్మార్ట్‌ శంకర్‌” సినిమా అద్భుత విజయాన్ని పురస్కరించుకొని, ఆ సంతోషాన్ని మీ అందరితో పంచుకోవాలనిపించింది. ఒకప్పుడు సినిమాలు చేసి ప్రస్తుతం పని లేకుండా ఖాళీగా ఉండి తమ జీవితాలను సినిమాకి అంకితం చేసి, కష్టపడి పనిచేసిన డైరెక్టర్స్, కో-డైరెక్టర్స్ 20 మందికి మా వంతు ఆర్థిక సహాయం చేయాలనుకుంటున్నాం. ప్రేమతో అంగీకరించండి. ఇదేమి పెద్ద సహాయం కాదు, చిన్న చిరునవ్వులాంటి పలకరింపు అంతే…!

మా ఈ చిన్న సహాయం… మీకు ఏమాత్రం ఊరటనిచ్చినా చాలు… అది మా ప్రయాణానికి ఆశీస్సులుగా భావిస్తాం. మేము తలపెట్టే ఇలాంటి ఓ మంచి కార్యక్రమానికి మీ అందరిని ఆహ్వానిస్తున్నాం. మేము బ్రతికి ఉన్నంత కాలం ఇదే విధంగా దేవుడు శక్తిని ఇచ్చినట్లయితే మేము ప్రతి సంవత్సరం ఇలాగే సహాయం చేయాలని అనుకుంటున్నాం” అని ప్రకటనలో పేర్కొన్నారు.





Source link

LEAVE A REPLY

Please enter your comment!
Please enter your name here