పేదోడి పెద్ద మనసు.. టాయిలెట్లు కడుగుతూ.. 1600 నిరుపేద పిల్లలకు విద్యాదానం

0
0


రోజుల్లో కుటుంబాన్ని పోషించడం అంటేనే పెద్ద సవాల్. అలాంటిది ఆ పేద శ్రామికుడు నిరుపేద, అనాథ పిల్లలను చదివించే బాధ్యతను కూడా మోస్తున్నారు. వెల్డింగ్ కార్మికుడిగా సంపాదించే జీతం ఆ పిల్లల చదువులకు సరిపోదనే కారణంతో సాయంత్రం వేళల్లో మరుగుదొడ్లను కడుగుతున్నాడు. ఇప్పటివరకు 1600 పిల్లలను చదివించారు.

అలా మొదలైంది: లోకానికి సేవకుడు అవుతాడని అతని తల్లిదండ్రులకు ముందే తెలుసో ఏమో.. అతనికి లోగనాథన్ అని పేరుపెట్టారు. తమిళనాడులోని కొయంబతూర్‌కు చెందిన లోగనాథన్ నిరుపేద కుటుంబంలో జన్మించారు. దీంతో అతడు ఆరో తరగతి వరకు మాత్రమే చదువుకున్నారు. ఉపాధి కోసం వెల్డింగ్‌ను ఎంచుకున్నారు. చదువు విలువ తెలిసిన లోగనాథన్ తనలా నిరుపేద పిల్లలు నిరక్షరాస్యులుగా మిగిలిపోకూడదని భావించేవారు. దీంతో పేద, అనాథ పిల్లలను చదివించాలని నిర్ణయించుకున్నారు.

సేవ కోసం ‘పార్ట్‌టైమ్ జాబ్’: 12 ఏళ్ల వయస్సులో పేపర్ మిల్లులో, వర్క్ షాప్‌లలో పనిచేస్తూ.. ఆ డబ్బుతో తల్లిదండ్రులను పోషించేవారు. ప్రస్తుతం లోగనాథన్‌కు 53 ఏళ్లు. ఆయనకు ఇద్దరు పిల్లలు, భార్య ఉన్నారు. కూతురు ఇంటర్ చదువుతోంది. కొడుకు ఎంబీయే చేస్తున్నాడు. లోగనాథన్ తన రెక్కల కష్టంతో పిల్లలను చదివిస్తున్నారు. వెల్డింగ్ పనులతో వచ్చే సొమ్మును కుటుంబం ఖర్చులకే సరిపోవడంతో.. పేద పిల్లల కోసం పార్ట్‌టైమ్ జాబ్ చేయాలని నిర్ణయించుకున్నారు. దీంతో సాయంత్రం వేళల్లో కొయంబతూర్‌లోని వివిధ ప్రైవేట సంస్థల్లో మరుగుదొడ్లు కడుగుతున్నారు. గత 17 ఏళ్లుగా ఆయన ఇదే పనిలో ఉన్నారు. అలా సంపాదించిన సొమ్మును అనాథ శరణాలయాలకు, పేద పిల్లల చదువుకు మాత్రమే ఖర్చు చేస్తున్నారు.

2002 మొదలైన ఆయన సేవ ఇప్పటికీ కొనసాగుతూనే ఉంది. అప్పట్లో తీర ప్రాంతాల్లో ఉండే జాలరి కుటుంబాల్లో పిల్లలకు పుస్తకాలు, పెన్‌, పెన్సిళ్లు కొనుగోలు చేసి ఇచ్చేవారు. ప్రభుత్వ ఆధీనంలోని అనాథ శరణాలయాల్లో పిల్లల కోసం ఆయన ఏటా జిల్లా కలెక్టర్‌కు రూ.10వేలు విరాళంగా అందిస్తున్నారు. లోగనాథన్ సాయం వల్ల ఇప్పటివరకు 1600 మంది పిల్లలు చదువుకోగలిగారు.

ఎందుకు సిగ్గుపడాలి?: మరుగుదొడ్లు కడుగుతున్నాడని తెలిస్తే చాలామంది చిన్నచూపు చూస్తారని లోగనాథన్ ఓ పత్రిక ఇంటర్వ్యూలో తెలిపాడు. ‘‘ఇందులో సిగ్గుపడాల్సిన విషయం ఏముంది? నేను చేస్తున్న పని ప్రజల కోసమే కదా! వారి కోసమే వాటిని శుభ్రంగా ఉంచుతున్నాను. పైగా ఆ డబ్బును పేద పిల్లల చదువుకే ఉపయోగిస్తున్నా. మరి, నేనెందుకు సిగ్గుపడాలి? ఎవరైతే చులకన భావంతో చూస్తారో వారే సిగ్గుపడాలి’’ అని అన్నారు.

రూ.50తో మొదలు: ‘‘మరుగుదొడ్లు కడుగుతున్నానని తెలిసిన తర్వాత నా బంధువులు, స్నేహితులు నాతో మాట్లాడటం మానేశారు. ఎవరూ నా దగ్గరకు కూడా రావడవం లేదు. అయితే, ఆ బాధ నా మనసును తాకనివ్వలేదు. గంటకు రూ.50 తీసుకుని మరుగుదొడ్లు శుభ్రం చేసేవాడిని. ఈ పని వల్ల నెలకు రూ.2 వేల వరకు ఆదాయం వస్తోంది. ఈ సొమ్ములో పైసా కూడా నా సొంత ఖర్చులకు వాడను. వచ్చిన మొత్తాన్ని అనాథల కోసమే ఉపయోగిస్తాను. తక్కువ సమయం, తక్కువ పని.. ఎక్కువ డబ్బులను ఇచ్చే మార్గం ఇదేనని నా నమ్మకం’’ అని అన్నారు.

ట్రస్ట్ ప్రారంభిస్తా: ఒకప్పుడు నేను వెల్డింగ్ షాపులో శ్రామికుడిగా పనిచేసేవాడిని. ఆ డబ్బు నా కుటుంబం పోషణకు సరిపోయేది కాదు. పైగా నేను మరుగుదొడ్లు కడుగుతున్నానని తెలిసిన తర్వాత యజమాని ఇబ్బందిపడ్డాడు. దీంతో 2018లో సొంతంగా వెల్డింగ్ షాప్ ఏర్పాటు చేసుకున్నాను. ‘‘నా వల్ల ఇతరులు ఇబ్బంది పడకూడదని భావిస్తాను. నన్ను ఆ పని నుంచి తొలగించి కుటుంబం ముఖ్యమా? అనాథలు ముఖ్యమా అనే సందిగ్ధ పరిస్థితిలో నెట్టేస్తారనే భయం కూడా వెంటాడింది. అందుకే సొంతంగా ఈ షాపు ఏర్పాటు చేసుకున్నా. ఇప్పుడు నా పనికి అడ్డుతగిలేవారే లేరు. నా తర్వాత నా బిడ్డలు కూడా పేద, అనాథ పిల్లలకు సాయం చేస్తారని నమ్ముతున్నా. ఆర్థిక కారణాల వల్ల పేద పిల్లల చదువు ఆగిపోకూడదనే లక్ష్యంతో ‘చారిటబుల్ ఎడ్యుకేషనల్ ట్రస్ట్’ ప్రారంభించాలని అనుకుంటున్నా’’ అని తెలిపారు.



Source link

LEAVE A REPLY

Please enter your comment!
Please enter your name here