మన మిత్రదేశంతో మనకు ఝలక్ ఇవ్వాలనుకుని.. పాక్ చిత్తయ్యిందిలా!

0
2


ఐక్యరాజ్య సమితిలోని ఐదు శాశ్వత సభ్యదేశాల్లో ఒకటైన ఫ్రాన్స్.. భారత్‌కు మంచి మిత్రదేశమనే సంగతి తెలిసిందే. ఇటీవలి కాలంలో భారత్‌కు అండగా నిలుస్తోన్న దేశాల్లో ఫ్రాన్స్ ఒకటి. ఐక్యరాజ్య సమితిలో మసూద్ అజహర్‌పై నిషేధం విధించే విషయంలో ఫ్రాన్స్ మనకు బాసటగా నిలిచింది. 130 కోట్ల మంది జనాభాతో.. ప్రపంచంలోని అతిపెద్ద మార్కెట్లలో ఒకటిగా ఉన్న ఇండియాతో దోస్తీకి ఫ్రాన్స్ ఉత్సాహం చూపుతోంది. అలాంటి దేశంతో భారత్‌కు ఝలక్ ఇవ్వాలని పాకిస్థాన్ భావించింది. కానీ మన దౌత్యం కారణంగా దాని ఆశలు అడియాసలయ్యాయి. ఇంతకూ ఏం జరిగిందంటే..

పాక్ ఆక్రమిత కశ్మీర్ అధ్యక్షుడు మసూద్ ఖాన్‌తో ఫ్రాన్స్ నేషనల్ అసెంబ్లీలో ప్రసంగింపజేయాలని పాకిస్థాన్ భావించింది. ఫ్రెంచ్ పార్లమెంట్‌ దిగువ సభలో ముఖ్య అతిథిగా ప్రసంగించేందుకు మసూద్‌కు ఆహ్వానం కూడా పంపారు. పాక్ ఆక్రమిత కశ్మీర్ అధ్యక్షుడితో మీ పార్లమెంట్‌లో మాట్లాడించడమంటే.. మా సార్వభౌమత్వాన్ని అవమానించడమేనని ఫ్రాన్స్ విదేశాంగ శాఖకు భారత్ తెలిపింది. ఆ దేశ స్పీకర్‌కు మెయిల్స్ కూడా పంపింది. దీంతో విషయం అర్థమైన ఫ్రాన్స్ ఈ విషయంలో సైలెంట్ అయిపోయింది.

పరిస్థితి అర్థమైన పాకిస్థాన్ దౌత్యాధికారులు రంగంలోకి దిగారు. కానీ ఫలితం లేకపోయింది.. మసూద్‌కు ఆహ్వానం రద్దయ్యింది. దీంతో ఆయన బదులు పాకిస్థాన్ రాయబారి మొయిన్ ఉల్ హక్ ప్రసంగించారు. ఆ కార్యక్రమానికి పాకిస్థాన్ దౌత్య అధికారులు మినహా స్థానికులెవరూ హాజరు కాలేదు. దీంతో ఆ సభ అట్టర్ ఫ్లాప్ అయ్యింది.

అంతేకాదు పీవోకే అధ్యక్షుడి గౌరవార్థం హక్ డిన్నర్ పార్టీ ఏర్పాటు చేయాలని భావించారు. అది కూడా రద్దయ్యింది. కశ్మీర్ సమస్యను భారత్, పాక్ దేశాలే పరిష్కరించుకోవాలని.. అది అంతర్జాతీయ సమస్య కాదని చెబుతున్న ఫ్రాన్స్.. ఇలా మరోసారి పాకిస్థాన్‌కు ఝలక్ ఇచ్చిందన్నమాట. పాపం పాక్.. తానొకటి తలిస్తే.. జరిగింది మరొకటి.



Source link

LEAVE A REPLY

Please enter your comment!
Please enter your name here