ముందు నేను, తర్వాత మీరు.. ఇమ్రాన్ పర్యటనకు ఒక్క రోజు ముందే.. చైనా వెళ్లిన పాక్ ఆర్మీ చీఫ్

0
1


పాకిస్థాన్ ప్రధాన మంత్రి ఇమ్రాన్‌ ఖాన్ చైనాలో పర్యటిస్తున్నారు. జిన్‌పింగ్ భారత్ పర్యటనకు ముందు పాక్ ప్రధాని చైనా పర్యటన ఆసక్తి కలిగిస్తోంది. ఇమ్రాన్ ఖాన్ మంగళవారం చైనా బయల్దేరి వెళ్లగా.. అంతకు ఒక్క రోజు ముందే పాకిస్థాన్ ఆర్మీ చీఫ్ ఖమర్ జావెద్ బజ్వా చైనాలో అడుగుపెట్టడం గమనార్హం. ఇటీవలి కాలంలో ఇమ్రాన్ బలహీన పడుతున్నారని.. పాక్ ప్రభుత్వ వ్యవహారాల్లో ఆర్మీ జోక్యం పెరుగుతోందని వార్తలు వెలువడుతున్న తరుణంలో.. ఇమ్రాన్ ఖాన్‌తోపాటు ఆర్మీ చీఫ్ కూడా చైనాలో పర్యటిస్తుండటం ఆసక్తి కలిగిస్తోంది.

ఈ మధ్యే పెట్టుబడుల కోసం పాకిస్థాన్‌లో వ్యాపారవేత్తలతో ఆర్మీ చీఫ్ సమావేశం నిర్వహించడం ఆశ్చర్యం కలిగించింది. ఇప్పుడు ఆయన ఇమ్రాన్ కంటే ముందే చైనా చేరుకోవడాన్ని బట్టి.. పాక్ ప్రభుత్వ వ్యవహారాల్లో ఆర్మీ జోక్యం ఎంతగా ఉందో అర్థం చేసుకోవచ్చు. చైనా నుంచి భారీగా పెట్టుబడులతోపాటు కశ్మీర్ విషయంలో మద్దతు కోరుతున్న ఇమ్రాన్ ఖాన్.. పారిశ్రామిక వేత్తలతో భేటీ అయ్యారు. కశ్మీర్‌ను టార్గెట్‌గా చేసుకున్న బజ్వా.. చైనా మిలటరీ అధికారులతో సమావేశం అయ్యారు.

చైనా కూడా ఇమ్రాన్ ఖాన్‌తో సమానంగా బజ్వాకు ప్రాధాన్యం ఇస్తోంది. వాస్తవానికి చైనా పర్యటన కోసం ఇమ్రాన్ ఖాన్ కొందరు అధికారులను ఎంపిక చేశారు. అందులో బజ్వా పేరు లేదు. కానీ చివరి నిమిషంలో ఆర్మీ చీఫ్ పేరు చేర్చారు. ఇమ్రాన్‌తో పాక్ ఆర్మీ చీఫ్ రావడానికి డ్రాగన్ కూడా ఓకే చెప్పింది.

చైనా పర్యటనలో భాగంగా ఆ దేశ అధ్యక్షుడు జిన్‌పింగ్‌తో ఇమ్రాన్ ఖాన్ భేటీ కానున్నారు. ఆ సమావేశంలోనూ బజ్వా పాల్గొనే అవకాశం ఉంది. ఇమ్రాన్ ఖాన్ అధికారంలోకి వచ్చిన నాటి నుంచి చైనా నాయకత్వాన్ని మెప్పించడంలో అంతగా విజయవంతం కాలేకపోతున్నారని.. అందుకే బజ్వా కూడా రంగంలోకి దిగారని చెబుతున్నారు. వాస్తవానికి విదేశాంగ శాఖ మంత్రులు లేదా కీలక అధికారులు దేశాధినేతల విదేశీ పర్యటన సమయంలో ముందుగానే వెళ్లి ముఖ్య విషయాల మీద ఓ అవగాహనకు వచ్చేలా చర్చలు జరుపుతారు. కానీ పాక్ ఆర్మీ చీఫ్ విదేశాంగ వ్యవహారాల్లోనూ తలదూరుస్తుండటం గమనార్హం.

ఇమ్రాన్ ఖాన్ ఏడాదిలోగా చైనాలో పర్యటిస్తుండటం ఇది మూడోసారి కావడం గమనార్హం. చైనా పాక్ ఎకనమిక్ కారిడార్‌లో పెట్టుబడుల కోసం.. ఆర్థికంగా తీవ్ర కష్టాల్లో ఉన్న తమ దేశాన్ని ఆదుకోవడం కోసం ఇమ్రాన్ జిన్‌పింగ్ వైపు చూస్తున్నారు.

ఇమ్రాన్ ఇటీవలే ఆర్మీ చీఫ్‌గా బజ్వా పదవీ కాలాన్ని మరో మూడేళ్లు పొడిగించారు. పాకిస్థాన్ చరిత్రను ఓసారి గమనిస్తే.. మూడుసార్లు ఆర్మీ ప్రభుత్వాలను కూలదోసింది. పాక్ స్వతంత్ర దేశంగా అవతరించాక.. సగం రోజులు ఆర్మీనే పరిపాలించింది. బజ్వాకు ప్రాధాన్యం పెరుగుతున్న తీరు చూస్తుంటే.. మరోసారి పాక్‌లో సైనిక పాలన వచ్చినా ఆశ్చర్యపోవాల్సిన అవసరం లేదేమో.



Source link

LEAVE A REPLY

Please enter your comment!
Please enter your name here